مشيرة موسي تكتب ” كلام ستات للستات “

دردشة النهاردة عن الستات … اللي زمان كانوا بيقولوا عليهن ” الجنس الناعم “…واضح ان انا عندي عقدة كبيرة جدا …انا واحدة بأحب الجمال المصري …لون السمار المصري … العيون المصري … الضحكة المصري … بالعربي الست المصرية زمان في الريف أو الحضر … كان ليها طلة وحلاوة خاصة … جمال مع حياء مع شقاوة مع دم خفيف مع شهامة مع مجدعة …حاجة كده نقاوة … توليف عجيبة غريبة …إنما اييييه … سيبكم بأااااه من الشكل والروح …اللي هي خلقة ربنا …نيجي بااااه للزي أو الملابس … اللي هي ” ذوق خالص “… بصوا علي صور البنات والموظفات والأمهات والجدات …بصوا علي الفساتين… اشي بوسط واشي درابيه واشي واشي … بصوا علي صور الأفراح … بصوا علي الفساتين … بصوا علي الجلاليب الفلاحي بالوانها المبهجة … ما علينا … ليه بأااااه النهاردة جايبة سيرة الستات بالذات …هاقولكم اهوه … بس واحدة واحدة … من كام يوم كنت في مكان ما … صادف انه كان وقت خروج موظفي احدي الوزارات … يا نهااااااااار ابيض ايه ده … من غير زعل …فجأة لقيت الشارع كله ستات كتيييييير(معظمه يعني)… ستات كلهم شكل واحد … المقاس ٢٢+ انجليزي …لبسهم كأنه زي مدرسي بألوان باهتة مختلفة قليلا …لابسين ايه بأااااه … اما بلوزة واسعة ملهاش شكل تشبه القميص الرجالي مع جونلة واسعة برضه اشبه بكيس المخدة مع اضافة استك في الوسط وايشارب كبيييير …أو عباية سوداء من قماش صناعي … ” كلهن ” في حالة إرهاق وتعب شايلين أكياس خضار وطلبات البيت … ماشيين في تكاسل تام …و” بعضهن ” في الطريق للالحاق باتوبيس الشغل … ايه ده يا ستات … ايه كل الهم اللي شايلينه ده … قبل ماحد يقول المسئولية والهم والعيال …ردي هو الهم والمشاكل عندنا كلنا … ليه سايبين نفسكم كده … وبالمناسبة محدش يقول اللبس غالي … عندي صديقات بيروحوا ” وكالة البلح ” يشتروا احلي واشيك هدوم بأسعار تضحك …يعني رخيصة جدااااااااا … انا بتكلم عن الذوق …الذوق …الذوق…راح فين الذوق والحس الجمالي …مصر زمان كانت الموضة بتنزل فيها قبل باريس … طبعا قلة الذوق دي مشكلة كبيرة طالت الإنسان المصري …والشارع المصري … والعمارة المصرية … وحاجات كتيرة جدااااااااا … ارجعوا الله يكرمكم للماضي القريب … شوفوا صور المصريين وحلاوتهم في السبعينات … بما اني باتكلم عن الذوق والحلاوة والجمال الطبيعي … مش قادرة … لازم اقول عن محاولة تقليد بعض المصريات لاشكال الجمال في بعض الدول العربية … الحواجب عرض عرضين دي … مش موضة ولو موضة مش بتليق علي اي حد … الشفاه المنتفخة جدااااااااا وكأن نحلة قد لدغتها …مش لأي وجه … واذا كنت ملتزمة وترتدي الحجاب … فهي موضة غير مناسبة تماما … الشعر الأصفر لا يناسب كل ست … لا اريد ان ادخل في مقارنات … ولكن انظروا الي جمال الممثلات او المذيعات ايام زمان … بدون بوتكس أو فيللر … انظروا للسمراء منهن أو الشقراء … جمال رباني … وذوق … واختيار ما يناسب كل جسم … كده انا طولت عليكم … طبعا لسه في كلام واقف في زوري عن الرجالة … امبارح كنت قاعدة مع ستات … كل واحدة حكت عن تجربتها مع الرجالة … حكايات تشيب والله … بس مش وقته … المهم هنا علموا أولادكم يقولوا “الله…الله …الله ” علي جمال وردة …مناظرالطبيعة …البحر …السماء …علموا أولادكم الاحساس بالجمال …